Það besta frá hafinu umhverfis Ísland

Hafið umhverfis Ísland er hreint og íslenskar sjávarafurðir eru heilnæmar og næringarríkar.

Skrunaðu

Óspillt haf

Niðurstöður rannsókna sýna að hafið umhverfis Ísland er hreint og íslenskar sjávarafurðir eru heilnæmar og næringarríkar. Velferð Íslendinga hefur byggst á skynsamlegri nýtingu auðlindarinnar. Vöktun Norður-Atlantshafsins og Norður-Íshafsins byggist á fjölþjóðlegum samningum og rannsóknum vísindamanna auk þess sem lögð er áhersla á séríslensk rannsóknarverkefni á hafinu umhverfis landið.

Brim leggur sitt af mörkum með góðri umgengni um þá auðlind sem hafið umhverfis Ísland er. Mikilvægt er að skila vistkerfi sjávar í jafngóðu eða betra ástandi til komandi kynslóða. Á því byggist framtíð fyrirtækisins.

Ábyrg fiskveiðistjórnun

Fiskveiðistjórnun á Íslandsmiðum byggist á lögum um stjórn fiskveiða nr. 38/1990 og Hafréttarsáttmála Sameinuðu þjóðanna. Þau grundvallast á aflamarkskerfi í þeim tegundum sem veiðar eru takmarkaðar á.

Stjórnvöld, í samráði við hagsmunaaðila, vinna ötullega að því að tryggja sjálfbæra nýtingu á auðlindinni. Ákvarðanir eru ávallt teknar á vísindalegum forsendum og er þar byggt á starfi Hafrannsóknastofnunar.

Fiskverndun á Íslandsmiðum er byggð á þremur grundvallaraðferðum:

Aflareglu sem er þróuð fyrir hvern nytjastofn. Í því felst að ákvarðað er hversu stórt hlutfall er veitt af veiðistofni ár hvert.

Reglum varðandi útbúnað veiðarfæra. Áhersla er lögð á kjörhæfni veiðarfæra sem þýðir að reynt er að veiða einungis þær tegundir og þá stærð af fiski sem leitað er eftir.

Með verndun og lokun ákveðinna svæða. Í þessu felst að ákveðin veiðarfæri eru bönnuð á tilteknum svæðum eða þá að svæði eru algjörlega lokuð fyrir veiðum. Þetta er gert til að vernda t.d. hrygningarfisk og ungvið.

Skipategundir

Ísfisktogarar

Brim gerir út þrjá ísfisktogara og sjá þeir botnfiskvinnslu félagsins fyrir afla til vinnslu. Þeir eru vel tækjum búnir og veiða botnfisk, aðallega þorsk, karfa og ufsa. Lögð er áhersla á góða meðhöndlun og kælingu aflans. Þannig fá vinnslurnar úrvals afla sem svo skilar sér í afurðum af bestu gæðum til viðskiptavina.

Uppsjávarskipin

Brim gerir út þrjú uppsjávarskip og sjá þau uppsjávarvinnslum félagsins fyrir afla. Skipin eru sérhæfð í að veiða uppsjávarfisk: makríl, síld, loðnu og kolmunna. Aflanum er dælt í öfluga sjókælitanka. Við löndun er síðan dælt úr tönkunum í landvinnsluna sem vinnur aflann jafnóðum. Þessi aðferð tryggir ferskt og gott hráefni sem skilar sér í afurðum af bestu gæðum.

Frystitogarar

Brim gerir út tvo vel útbúna frystitogara sem veiða grálúðu, karfa, þorsk, ýsu, ufsa, gulllax og makríl auk ýmissa annarra fisktegunda. Aflinn er stærðarflokkaður og ýmist flakaður eða frystur heill um leið og hann kemur um borð. Afraksturinn er framúrskarandi fiskur úr hreinu og ómenguðu hafi.

Aflaheimildir - Úthlutun 2025/2026

Fisktegund	Hlutdeild	Úthlutun (tonn)	Tímabil
Botnfiskur
Þorskur	7,9%	12.719	2025/26
Ýsa	9,0%	5.525	2025/26
Ufsi	20,0%	9.459	2025/26
Gullkarfi	27,3%	9.374	2025/26
Djúpkarfi	28,8%	683	2025/26
Úthafskarfi	35,7%	0	2025/26
Grálúða	12,6%	1.294	2025/26
Gulllax	40,2%	2.960	2025/26
Þorskur í norskri lögsögu	39,9%	0	2026
Þorskur í rússneskri lögsögu	45,9%	0	2026
Aðrar tegundir innan kvóta		1.158	2025/26
		43.170
Uppsjávarfiskur
Loðna	18,0%	25.716	2025/26
Íslensk sumargotssíld	11,1%	10.856	2025/26
Norsk-íslensk síld	14,1%	11.125	2026
Kolmunni	20,9%	35.606	2026
Makríll	20,3%	6.044	2026
		89.347