FréttirSkrá á póstlista

18.10.2021

Nóg af þorski á Vestfjarðamiðum

,,Það gekk mjög vel. Við vorum með 600 kör af fiski en það er fullfermi, eða 180 til 190 tonn af fiski upp úr sjó. Veðrið var þokkalegt að mestu en þó gerði leiðindabrælu í einn dag,” segir Jóhannes Ellert Eiríksson (Elli), skipstjóri á ísfisktogaranum Viðey RE.

Togarinn kom til hafnar í Reykjavík í gærkvöldi og fer aftur á miðin á morgun. Elli segir að það hafi þjónað neinum tilgangi að fara í dag enda sé vond spá fyrir veiðisvæðið næsta sólarhringinn.

,,Við höfum aðallega verið í kantinum út af Patreksfirði og þaðan höfum við unnið okkur norður á Halamið. Við erum á höttunum eftir þorski á þessum árstíma og það er nóg af honum á Vestfjarðamiðum. Veðráttan er okkar versti óvinur og t.a.m. var vitlaust veður í tvo og hálfan sólarhring í túrnum á undan. Þá vorum við með rúmlega 400 kör af afla ef ég man rétt,” segir Elli en hann og aðrir í áhöfninni eru vanir þessu, Runninn sé upp sá árstími að allra veðra sé von.

,,Ég held að það sé góð spá fyrir alla þessa viku að undanskildum morgundeginum. Spárnar hafa batnað mjög mikið og það er hending ef þær ganga ekki eftir. Maður tekur því viku í einu en hefur allan vara á,” segir Elli en hann kveður hina ísfisktogara Brims vera á svipuðu róli og þeir sjálfir. Vestfjarðamið séu vettvangurinn þar til að afli fari að glæðast á SV miðum. Það verður væntanlega í febrúar nk.

 

Nýjustu fréttir

Allar fréttir