FréttirSkrá á póstlista

11.10.2021

Hægt að veiða miklu meira af gullkarfa

Frystitogarinn Vigri RE er væntanlegur til hafnar í Reykjavík snemma í fyrramálið með um 360 tonna afla. Þetta er afrakstur seinni hluta yfirstandandi veiðiferðar en fram fór svokölluð millilöndun á afla fyrir rúmri viku síðan. Þá var 420 tonnum af fiski landað í Reykjavík. Heildaraflinn í veiðiferðinni var því 780 tonn af fiski upp úr sjó.

,,Við fórum nokkuð víða að þessu sinni. Markmiðið var að veiða sem mest af ufsa þá daga sem veðrið leyfði en þess á milli hröktumst við undan veðri frá norðri til suðurs,” segir Árni Gunnólfsson skipstjóri.

Að sögn Árna hófst veiðiferðin með veiðum á Vestfjarðamiðum. Ekki stóð það ævintýri lengi því það skall á með snælduvitlausri brælu sem þurfti að forða skipi og áhöfn undan.

,,Við hrökkluðumst undan þessu óveðri suður fyrir land. Fórum m.a. suður í Skerjadjúp og vorum svo að veiðum á Fjöllunum. Þar var vel hægt að finna ufsa en mest var af gullkarfa. Þótt það væri ekki eiginlegur karfatími var létt verk að fá a.m.k. sex til átta tonn af gullkarfa í stuttu holi. Mitt mat er að hægt væri að veiða miklu meira af gullkarfa ef kvóti ársins leyfði.”

Eftir millilöndunina í Reykjavík var aftur haldið á Vestfjarðamið enda var mesta óveðrið gengið yfir.  

,,Heilt yfir var fínn afli á Vestfjarðamiðum þá daga sem við gátum athafnað okkur. Mikið af gullkarfa í Víkurálnum, ufsi víða og ýsan að þvælast fyrir eins og venjulega. Við fengum einnig þorsk og unnum okkur alveg norður á Halamið. Þar var ágætur afli allt til að við þurftum aftur að flýja Vestfjarðamið vegna veðurs,” segir Árni en að sögn hans hefur skipið verið undanfarna daga að veiðum suður og suðvestur af Reykjanesi.

 

Nýjustu fréttir

Allar fréttir