FréttirSkrá á póstlista

19.05.2021

Veit ekki hvaðan öll þessi ýsa kemur

Ísfisktogarinn Viðey RE er nú í höfn í Reykjavík. Þar hefur togarinn verið síðan á sunnudag en þá kom hann með um 200 tonn af fiski að landi. Jóhannes Ellert Eiríksson (Elli) skipstjóri segir aflabrögðin hafa verið mjög góð og einmunablíða hafi verið á miðunum frá því í apríl.

,,Það hefur gengið mjög vel á miðunum undan SV landi. Það er reyndar svo mikill fiskur að við höfum bara þurft að nota eitt troll. Ef við notuðum bæði trollin þyrftum við að fá fleiri karla um borð til að gera að fisknum,” segir Elli en hann upplýsir að aflinn hafi verið jöfnum höndum ufsi, þorskur, ýsa og karfi í síðustu veiðferðum.

,,Ufsinn er samur við sig og kemur og fer. Óvænt ýsugengd hefur valdið okkur vandræðum. Ég man ekki eftir öðru eins frá því að ég fór fyrst til sjós. Útbreiðsla ýsunnar allt í kringum landið er með ólíkindum. Ég veit ekki hvaðan allur þessi fiskur kemur. Við höfum fram að þessu litið á ýsuna sem meðafla á öðrum veiðum. Nú er meðaflinn orðinn svo mikill að margir hafa lent í vandræðum. Það hjálpaði mikið að 8.000 tonnum var bætt við ýsukvóta ársins á dögunum en sú auking á að dragast af kvóta næsta árs,” segir Elli en hann segir að stefnt sé að því að brottför frá Reykjavík verði í kvöld.

 

Nýjustu fréttir

Allar fréttir