FréttirSkrá á póstlista

15.02.2021

Ýsan er alls staðar

,,Ufsinn er óvenju brellinn um þessar mundir. Hann hefur ekki fundist á Vestfjarðamiðum og hér fyrir sunnan land er leitun að honum. Við fáum eitt og eitt þokkalegt ufsahol og svo er leitað og leitað,” segir Friðleifur Einarsson, skipstjóri á ísfisktogaranum Helgu Maríu AK.

Að sögn Leifs hefur hann leitað fyrir sér á Eldeyjarbanka, Reykjanesgrunni og Fjöllunum að þessu sinni.

,,Það er nóg af gullkarfa og ýsu en ufsinn er sem fyrr segir vandfundinn. Reyndar er það svo að við erum á hálfgerðum flótta undan ýsunni því það virðist vera ýsa alls staðar þar sem trolli er dýft,” segir Leifur en skipið á að vera í höfn í Reykjavík nk. fimmtudag.

Leifi reiknast til að aflinn sé kominn í 60 tonn.

,,Við vildum gjarnan vera með meira en það hefur verið skítabræla á okkur og hvergi skjól að hafa. Veðrið var virkilega slæmt um helgina en við reyndum hvað við gátum. Við erum aðeins byrjaðir að verða varir við hrygningarþorsk en í augnablikinu höfum við þó mestar áhyggjur af því að veiða ekki of mikið af ýsu. Fiskurinn virðist annars vera vel haldinn og er stór og góður,” segir Friðleifur Einarsson.

 

Nýjustu fréttir

Allar fréttir