FréttirSkrá á póstlista

24.09.2020

Veiðin fyrir Norðurlandi tekin að dala

Von er á ísfisktogaranum Akurey AK til hafnar á Sauðárkróki á fjórða tímanum í dag en togarinn er að ljúka fjögurra daga veiðiferð á miðin úti fyrir Norðurlandi. Að sögn skipstjórans, Magnúsar Kristjánssonar, var lítið um þorsk á slóðinni og erfitt tíðarfar torveldaði veiðar.

,,Það brældi mikið og þá einkum síðustu dagana. Við byrjuðum á því að nota tvö toll en eftir að veðrið versnaði til muna þá var ekki hægt annað en að toga með einu trolli,” segir Magnús.

Akurey hefur verið á Norðurlandsmiðum frá því í lok júní og Magnús segir að lengst hafi þorskur verið á svæðinu.

,,Nú virðist þorskurinn vera að hverfa og það er ekki mikið um annan afla. Núna erum við með 65 tonna afla og þar af þorskaflinn meiri en 50 tonn. Við fórum austur á Sléttugrunn til að leita fyrir okkur en annars vorum við mest hér úti af Skagafirði. Mér kæmi ekki á óvart þótt við yrðum næst sendir á Vestfjarðamið en það kemur bara í ljós,” segir Magnús Kristjánsson.

Nýjustu fréttir

Allar fréttir