FréttirSkrá á póstlista

29.05.2020

Þokkaleg grálúðuveiði á Hampiðjutorginu

,,Besti grálúðuveiðitíminn er að fjara út en þetta hefur verið þokkalegasta kropp hjá okkur á Hampiðjutorginu. Aflinn er að vanda bestur þegar hitaskil ganga yfir slóðina en þess utan höfum við fengið alveg ágætan afla með því að toga norður eða suður slóðina.”

Þetta segir Kristján Víðir Kristjánsson, skipstjóri á frystitogaranum Örfirisey RE, en er samband náðist við Kristján Víði var hann einmitt að toga eftir hitaskilum sem gengið höfðu suður slóðina.

,,Apríl og maí eru jafnan þeir mánuðir sem hafa verið besti grálúðuveiðitíminn og venjulega dettur veiðin ekki niður fyrr en eftir sjómannadaginn,” segir Kristján Víðir en að hans sögn hófst veiðin í yfirstandandi veiðiferð á Halamiðum.

,,Við fengum dálítið af ufsa á Halanum en þar var enginn karfi. Þorskurinn hefur flætt yfir Víkuálinn og þar er heldur engan karfa að finna. Við höfum skotist í Nætursöluna, sem er hér austan við okkur í Víkurálnum, og þar fæst dálítið af ufsa með þorskinum sem er alls ráðandi. Jafnvel hér á Torginu fáum við þorsk með grálúðunni en karfinn sést ekki,” segir Kristján Víðir Kristjánsson.

Reiknað er með því að Örfirisey verði á grálúðuslóðinni á Hampiðjutorginu fram í næstu viku en komi til hafnar í Reykjavík fyrir hádegi á laugardag í hefðbundið frí vegna sjómannadagsins.

 

Nýjustu fréttir

Allar fréttir