FréttirSkrá á póstlista

27.04.2020

Rúmlega 5.000 tonn af kolmunna til Vopnafjarðar í síðustu viku

Víkingur AK og Venus NS komu bæði til Vopnafjarðar í síðustu viku með samtals rúmlega 5.000 tonn af kolmunna. Afli Víkings var um 2.550 tonn en Venus var með rúmlega 2.600 tonna afla.

Við náðum tali af Hjalta Einarssyni, skipstjóra á Víkingi AK, en skipið var þá á sínu öðru holi í veiðiferðinni sunnarlega í færeysku lögsögunni. Að sögn Hjalta kom Víkingur á miðin frá Vopnafirði í gærmorgun.

,,Það er togað lengi eða í um 20 tíma í senn og aflinn í fyrsta holinu var um 330 tonn. Kolmunninn virðist ganga rólega hingað norður eftir og aflinn er mjög misjafn. Albert Sveinsson var með skipið í síðustu veiðiferð og mér skilst á honum að það hafi fengist frá um 200 tonnum og upp í 580 tonn í holi. Reyndar þurftu menn að bíða lengi eftir því að kolmunninn skilaði sér inn í færeysku lögsöguna og skip Brims biðu t.a.m. í heila viku á miðunum áður en menn urðu varir við kolmunna í veiðanlegu magni,” sagði Hjalti Einarsson.

Mikill fjöldi skipa er nú á kolmunnaslóðinni í færeysku landhelginni. Auk Íslendinga eru það aðallega skip heimamanna og Rússa, auk eins grænlensks skips, sem hafa stundað veiðarnar.

 

Nýjustu fréttir

Allar fréttir