Gulllax

Argentina silus

Gulllax getur náð allt að 70 cm lengd en algeng stærð er 40-50 cm en vöxtur gulllaxa er frekar hægur. Hann getur orðið a.m.k. 25-30 ára gamall og kynþroska er náð þegar hann er 8-12 ára og um 36-40 cm langur. Gulllax finnst mest undan suðaustur-, suður- og vesturströndinni, frá Rósagarði og vestur á Halamið og Djúpál. Hans verður vart allt í kringum landið, en er sjaldséður norðanlands og austan. Fæðan er allskonar smákrabbadýr eins og ljósáta og marflær en einnig pílormar, smokkfiskur, kambhveljur og smáfiskar. Gulllax er miðsævis- og botnfiskur á leir- og sandbotni á 100-1400 metra dýpi en algengastur er hann á 300-600 m. Hann heldur sig við botn á daginn en syndir upp um sjó á nóttunni. Á veturna dýpkar hann á sér en kemur á grynnra vatn með vorinu.